[ talkstory Category ]
June 30, 2004

Boo Story

I wen come home from work tired kine. I wen turn on da tv just fo make noise, an den I wen crash on da couch. Da Oprah show stay on da tv. Eh, I no watch dat kine, but I tired fo get up fo grab da clicka an change da channel.

I wen close my eyes fo go moi moi, but I no can sleep cuz I stay hearing Oprah talking story. Da topic was communicating wit da loved one dat wen die.

On da stage, had four peoples dat each wen lose one family membah. Had one dentist, one high school teacha, one lawyah, an one cop. At first I wen tink, nah, dis not fo real kine. But den I figah why dey going lie about someting lidat fo?

Anyways, each one of da peoples, dey wen tell about da loved one dat wen die. Ho, was sad you know. An dey tell dat dey like try talk wit da loved one just one mo time.

Oh, on da stage had one doctah too. Da doctah wen tell dat it's possible fo talk wit da spirit of da loved one. Fo do dat, da doctah tell dat all you need is one dark kine room wit no more light inside, an one big kine mirrah fo stare-stare when calling fo da spirit. Oprah den tell dat da doctah going help dem, an aftah da commercial dey going come back.

Aftahs, had all of dem on da stage. Dey wen tell what wen happen, an all of dem wen say dat dey wen talk wit da spirit of da loved one. All of dem stay crying, Oprah too. But dey was mo happy den sad cuz dey get da chance fo talk wit da loved one.

Aftah, Girlfriend wen come home from work. I wen tell her about da Oprah show. I figah she going get scared. But her, she like try do dat kine. Me, I just like take one showah already an eat dinnah. I told her dat we no can do dat kine cuz we only get one small kine mirrah in da lua. Plus, get too much light inside. Still yet she like try. Den I go fo take showah an she all habut. She always act lidat wen she no get her way. She hardhead dats why.

I come outside da lua, an Girlfriend stay talking on da phone. I nevah know who she stay talking wit, but I figah bettah she on da phone den fo her make all huhu wit me.

Den she come insai da kitchen all happy-kine. She tell me dat she wen call her auntie, an da auntie wen call da uncle at work. Da uncle is one janitah at Ala Moana Shopping Centah, an he cleans nighttime. He wen tell her dat it's okay fo us fo come an use da public lua wen da mall stay close.

I know already what she like do. But if I tell her I no like go, den I know she going be all habut. Bettah I just tell dat I no like go, but I nevah. Den she tell me dat she going buy us dinnah aftahs, an I tell whatevahs.

Wen I drove insai Ala Moana, da whole place stay empty. We saw da uncle squirting da sidewalk wit da hose. He wen look at us funny-kine, like he don't know watsup. Girlfriend wen go fo talk wit him, but I just wen cruise by da car. Den she tell me fo come, an we go walk to da lua. Da uncle look at us like we lolo, but I nevah say nutting to him. He tell us fo use da Wahine lua cuz he still yet nevah clean da men's one.

Da lua stay clean an da floor was still yet wet. Get one big kine mirrah on da wall above all da sinks. I was little bit nervous fo do dis kine. No, I wasn't scared, I just no like act stupid an call ghosts fo come. Bad luck fo do dat kine. Girlfriend was more scared den me. I wen tell her no need fo do dis kine, but still yet she like try. K-den, I tell, we go do em.

I wen turn off da light, an da room came dark. I wen walk ovah by Girlfriend, an she wen grab fo hole my hand. She wen tell me fo call somebody's name, but I wen tell her fo call somebody. She wen call her tutu, her muddah's muddah. She wen die six years ago, I tinkso. We was both making stare-stare in da mirrah, an girlfriend stay calling, "TuTu Lani...Tutu Lani...Tutu Lani."

Aftah one short time, we both was seeing little lights. It was like stahs flashing in da sky. I nevah know if da light was in da mirrah or was my eyes making funny-kine. Girlfriend stay squeezing my hand, an still yet she calling for Tutu Lani. All of a sudden da room came more dark. Ho brah, was so dark, I couldn't see my hand in front of my face.

And den, someting in da mirrah wen move. At first it wen look like one cloud. Girlfriend an I stay seeing da stuffs at da same time. Da cloud was moving from side to side, first in front of me an den in front of Girlfriend. "Tutu Lani! Tutu Lani!" Girlfriend said.

Slowly, da cloud was forming into one shape. It was a face. It was one man's face! His eyes wen look right into ours, an he wen make stink eye at us. Girlfriend wen scream loud kine. Wen she scream she scare me an I took one flop on da floor. I wen look up at da mirrah, an da man had blood coming from his head. Girlfriend was still yet screaming an trying fo step ovah me, an I was trying fo get up so we could run out. I wen look back up at da mirrah, an I saw da man reach out an grab Girlfriend by da neck. We was still yet holding hands, but da man wen pull her off da ground. His one hand was more strong den both my hands. Da man was pulling Girlfriend into da mirrah an she was screaming fo me fo help her. I wen move fast-kine to the light switch, but wen I wen turn em on, da man an girlfriend was both gone.

Da cops nevah did find Girlfriend. At first dey wen tink dat I wen do someting to her, but da uncle wen back me up. Nowadays, when I drive by Ala Moana, I still get chicken skin fo tink about dat night. To dis day, I still yet hear Girlfriend screaming fo help. I wish dat I could have done someting fo save her. I don't tink I will evah look in any mirrah da same way as before.

(In Memory of Glen Grant)

Posted by Kane at June 30, 2004 09:50 PM

Comments

 
Posted by Ryan on July 1, 2004 9:25 AM:

What a great story! And just after I read the latest entry by our newest `ohana member, Kainoa. I stay all piha wit' dakine local writing pride. (Too bad I no do pidgin too good.)

 
Posted by kane on July 1, 2004 3:01 PM:

Ryan, thanks for taking the time to read the post. I know the post is kind of long, and few people have the time or interest in reading short-stories on the web.

Thanks for you kind words of support, and for the heads-up on Kainoa.

 
Posted by kukuns on July 1, 2004 6:29 PM:

ho chicken skin dat kine, but eh, kane you stay roaching one Glen Grant story or das fo real kine?? Cuz I know da "manongs" get one ritual like dat where dey look in da mirrah and call da dead and release some smoke in one bottle, or sumting li' dat, but dat kine stuff trippy, no? And das why I no call to da dead cause my grams always tell us from keiki time no good cause you might call da kepalo and ha-la bustead he goin ride your back and make you go pupule, and das why you no whistle at night too. So, I don no dat kine, bes leave da dead, dead...but eh one damn good story!! i stay all freaked out fo' go in one lua wit one big mirrah now. Ah lose money me, I no can handle dat kine scary stories, but eh das da bes kines.

 
Posted by kane on July 2, 2004 3:49 AM:

Kukuns, thanks for reading the post and for taking the time to comment.

The story wasn't 'roached' from Glen Grant, but rather it is based (loosely) on an experience from my own life. Seeing how ghost stories are so popular in the islands, I decided to write the short-story in Pidgin to give the character a local perspective.

Thanks again for sharing your thoughts.

 
Posted by ali on July 6, 2004 11:24 PM:

Excellent chicken skin story! I'm sure Glen Grant would be proud that you've used your skills to honor his style! Big mirrors in public restrooms are pretty creepy.

 
Posted by kane on July 7, 2004 4:52 AM:

Ali, thanks for reading the story and for sharing your feedback and thoughts. Aloha to you.

Post a Comment

Name:


Email Address:


URL:


Comments:


Remember info?



« Bus drivers are overpaid sloths who have no remorse | Kauai- Or How To Have a Great Weekend With Your Baby »
[ HawaiiAnswers.com - You ask, Hawaii answers. ] [ HawaiiAnswers.com - Hawaii's first online news source. ] [ HawaiiAnswers.com - Let's talk story. ]
Main Page  ::  © 2002-2004 HawaiiStories  ::  E-Mail